الشاعر إبراهيم رضوان يهدي قصيدة حب لرئيس التحرير بعنوان “يا صاحبي مبارك الأشواق”

يا صاحبي مبارك الأشواق
و بعد بعاد..و بعد فراق
لمحتك زي مهرة شوق..
بتتهادى على الأوراق
تصهلل..
تنطق الأشواق
ما بين الحرف والمعنى
راقبتك قبل ما الأيام تجمعنا
وترفعنا..
على ميزان الدهب والفضه
ترضعنا ..
عصير القمح والحنطه
لأنك صاحب الإنسان
و ساكن جوه مل كيان
لقيت نفس العسل هو
ونفس الملح والشطه
لقيت حرفك ساعات لين
ساعات في الشوق يتوهني
لقيتك فجأة تشبهني
ساعات أسمع نداك عالي..
ببندهني
ويوم ألقاك يا صاحبي مبارك المحروس
في عالم تاني و يا فكرك الواعي
و حاسس باللي كان حواليك
ومن حواليك ..ما بينهم خرس
بينهم لسه سقط متاع
و صاحبك يا مبارك كان.
ساعات هادي..
ساعات ملتاع
ساعات مشدود ..
في نص السكة نفسياً
ساعات من كل شيء مرتاح
يا عاشق تملك المفتاح..
لباب يمكن يكون واحد
ويمكن تسعه أو أكتر
و بدرك يا صديق الله..
ساعات نايم ف حضن الزير..
ساعات عنتر
ساعات ناشف..
ساعات أخضر
و صابعك فوق زناد الحرف..
لسه أوانه مش موجود
لكنه أكيد
هايصبح أي يوم موجود
لكنه ساعات..بيقلق فيك
لحد السهد ما بيسود
و يهرب من عنيك النوم
في قلبك لاجل كل الناس هموم و هموم
وتقدر تعترف إنك نتاج..
كل اللي هزك يوم
حقوقك عمرها ماتضيع..
في وسط مرابي..
بيحاسبك على المحسوب
ساعات تصبح حزين جدا..
و عمرك يوم ..
ما كنت في أي شيء معصوب ولا مغصوب..
تقول كلمة ما هيش عاجباك
وتنبض ويا فكرك نبض مش عادي
ويعلى الضغط
يصبح كل شيء سادي
و تستدعي المواقف كلها..يمكن..
تحولها زهور طاهره علي الأوراق
كويتك ثوره مخلوطه مع العشاق..
وليا ..وانت ياما شاركتني ف نبعي
يا نحله بتعصر الورده وتنزفها..
عسل يشبه لوردتها
لكنه مكتسب لونها
يا عاشق ليلى طول الليل
و بتصونها
يا خايف لا الكلاب من تاني تسجنها
وتعجنها.. حصان صلصال يشوهها
ما زال الخوف معاك
من شيء في قلب الكون يتوهها
وتندهها ..شبح نداهه
مش هي ولا هو
يا عاشق ليلى من جوه
ومن بره
يا كاسر بالحروف الجره..
لجل تدوس عناكبها
و تسند فوق طريق الخوف مناكبها
تدوس كل اللي حاول ليله يركبها
ويكتبها..
كلام فارغ و قول مكرور
ولا مغرور.. ولا مجرور..
من الودن اللي سمعت أعذب الألحان
أوانك حان
ما حانش لسه
لسه القفه فيها كتير
عيدان تغيير..
عيدان خضره
تفرط في الحروف
والخبره بتطاوعك
مبارك.. لسه بين صابعك..
خواتم لسه مش باينه
لأن الناس هنا فيهم
عقول خاينه
ونفسيات بدون مله
يا حاسس إن حرفك يوم..
الحرف..
علي ورقك ف يوم صلى
هاقول قربت م المطلوب
أكون دقه ف نبض قلوب
و اقول قربت م الملكوت
صبحلي صوت بيسمعني
وها يرجعني أيام الصبا
المفحوره تحت الجلد
من بدري
و ها يجيبلك سنين قمري
يا عايش بين حيطان الكل تتأمل
لابد الريحه تتكمل
لأنك لسه
فى الواقع ..
بتعشق رنة الأشعار
يا راسم لسه ف المزمار..
على قلمك
يزيد ألمك..
وتشرح في حروف عاجباك من الصاحب
ما نخجلشي نقول عنك في يوم أستاذ
بصوت رباني مش شاحب
تصاحب كل من حبك
لكنك واعي في النظره
في روحك بذره..
مش موجوده جوه كتير
في قلبك رغبه للتغيير
ف صمتك عاصفه
مش محسوسه إلا لصاحبك المجنون
ما بيننا ألف شاعر..
شعره مش مضمون
ولا موزون على روحنا
كفايه الصمت مرجحنا
على فخاده
كفايه جمالنا بيعاني في أوتاده
كفايه حروف بيتعادوا
وبيعادوا..
اللي قوله سليم
لا يمكن نرضى بالتسليم
ولا نكدب ف يوم أبداً
ولا نخضع لقاضي محاكم التحريم
ونرفض أي حرف قديم
بيتحنجل
ولا نأجل ف يوم مشاوير
ولا جمله
نكون ثوره حروف شامله
وسكه من بعيد كامله
يكون الفرق بين النحله والنمله
حروف بتغير المعنى
فسبحان الذي بالحب جمعنا
وسبحان الذي دمعنا ..
واحنا بنكتب الحرفين
و سبحان الذي …
خلى اللي كان واحد..
يكون اتنين
لمحتك وانت مش خايف من التنين
لكنك لسه خايف من نبال صياد..
ح تقتل تاني في العصفور
و مش عايز
حروفك تاني تتقيد
ونفسك تاني يرجع حرف أصحابك
يكون في الضوء ويتسيد
تخلى الفكر ينزل في القنايه الفضه.. يتوضى
نخلي الوز أخضر
لو تقيد لمضه
وهات للصاحب اللي يخاف..
في طاسه خضه..
لاجل تطمنه على طول
لأنك يا مبارك نور
لا يمكن ليله ينطق في كلام معسول
تقول..
غصبن عن السياف
لا ليله تخاف..
ولا ليله..
تصدق قولة العراف
لأنك في النهايه
بقين كشعلة نار
لهب على كل من خان الديار
والناس
تجيب للكون.. هدوم دمور
بتشبه ملبسك ساعه خروجك..
للطيور ع السور
تلاغي بابتسامه ..
بسمه العصفوره والعصفور
فتتهجي..
سياط فوق ضهر ظالم جار
وتتهجى..
ألم ضهر اللي كان محني من الشيله
يهدوا الحيل مع الحيله
فتعطي اللقمه للسائل و للمحروم
فتقضي اليوم
وتقضي الليله داخل نفسك الطاهره لحظه..
و بعد اللحظه ما تنامشي
بتتعاتب..
ليلاتي كتير مع ذاتك
وفيه صندوق بمليون لون
في روحك شايل الأسرار
أمام الجار قوي جداً
لكنك من خلال فكرك..
رقيق جدا ..
لأنك واقعي جداً
في دمك ديك..
ساعات يدن
وليله كامله بيعاند في مشوارك
يا شايل صره فيها
عجين بيتخمر
وطفله شريده بتشمر..
عشان تقدر تدافع عن شرف صوتها
مبارك كل ما جواك حصان أشهب
مصهلل..
شارد النظره
حروف حذره
وسايره
رغم صمت الصمت من حواليك
و يصحى الديك
يهز جناحه ويصحيك
وحضنك لسه ما نامشي
يا صاحبي مبارك الملهوف
مفيش جواك يا صاحب خوف
ما تقلقشي
مازال جواك قمر بيدور
وبيشقر على الطرقات
ما زال الفكر أخضر
جوه أشجارك
ونبعك زمزمي واضح
في أفكارك
وميت مليون..
قرار موجود مفيش عكسه
وعصفورك كره قفصه
لأنك شعله ع الطرقات
فخطي قناية المسافات
و حصل أي حد يكون..
بيعشق كلمته الطاهره
وكون زهره
ورقها شمع بينور
أراضي الكون
ألخص لك كلامي كله..
كون يا مبارك الإنساني..
أجمل عون
دا نور الرب..كن فيكون