خاص حماك
حاوره: فواز السعيدي
” حماك ” حاورت الشاعر والراوي والمؤرخ فهد الغضوري العنزي ففتح لنا قلبه وعقله وجاد بالكثير من المعاني السامية للقراء .
– بيت القصيد جميل من أشعار ضيفنا معروف ومشهور في شبه الجزيرة العربية ( نبي ليا عدوا أهل الفعل بالجيل … لنا مع طوال الأيادي أيادي )
– بو هيا لماذا بعدت عن ساحة الإعلام ؟
ظروف الحياة وإنشغالي للمقناص والحلال ، في حين لم يقصر معي الإعلام، دعاني كثير لعدد من الأمسيات والحوارات واعتذرت .
– فهد الغضوري .. كنز من القصص القديمة وتاريخ البادية كيف عرفت هذه القصص ؟
منذ طفولتي وأنا اعشق مجالسة كبار السن وألتقيت مع كثير من المؤرخين ، وسافرت إلى نجد والشمال والجنوب وقرأت للكتب وبعدها رأيت نفسي ولله الحمد امتلك الكثير من تاريخ البادية والقصص والقصائد وتفرعات أغلب القبائل العربية .
– بما انك تنتمي للغضاوره ..حدثنا عنهم ؟
الغضاوره يرجع نسبهم الي ضنا عليان من ولد سليمان من ضنا عبيد من ضنا بشر من عنزه وشيوخهم ابن سويلم وابن ظويهر , ويقال للغضاوره عيال العود والمجلى والدويله وشوكة الحرب ومنازلهم في نجد شمال غرب حائل وقراهم فيضة بن سويلم والحفيره والمصع ومواردهم الداره والسهله والوعره والبدع السانّه ولهم املاك في خيبر ، ومنهم من يسكن الكويت وهم من قديم العصور فيها في داخل السور , ومنهم في مهد الذهب .
– أين يجد الشاعر فهد الغضوري نفسه ؟
عند زحمة الناس واهل القيل والقالي
يرتاح بالي عن الصجات واللجه
انسى الهموم الثقيله وينشرح بالي
ومصّدر العايدي وماخذ معه سجه
مع خوة اللي لهم بالطيب منزالي
خوة شرف ماتجي بالزيف والدجه
والله مايجعل الرجال رجالي
الا العزوم القوّيه وقطّعت الفّرجه
– مارأيك بشعر الحداثة وماتفضل من الشعر الحداثة أم التقليدي ؟
الجزل يبقى جزل سواء حداثة او تقليدي
– أين أنت من شعر المحاورة ؟
في بداياتي كنت من عشاق المحاورة قبل النظم وحدثت لي محاورات مع شعراء معروفين وغير معروفين على الساحه .
– بما انك من عشاق حياة البادية هل كتبت عنهم ؟
تباشرو ياهل الولع جاكم سهيل
اربع ليالي … عدّها بالوكادي
والمخزن اللي فيه كل المعاميل
هاتو هوا شفي وغاية مرادي
الطير قرنس بدل الريش تبديل
وراعيه جاهز للدعو والهدادي
شافه صنيع وشنذر الطير بالليل
وأمسى مروبجها وعينه حدادي
عين الشجاع اللي نهار المصاويل
مايمنع الا اللي … علومه بعادي
مطروح قبل العام عقب البهاذيل
لولا الضما والوجوع ماجاك غادي
وجوه الشيوخ واسطتهم مراسيل
وعيا يبيع … وزاد راسه عنادي
أشقر وصافي منحره تقل منديل
قليل حليا الطير مثله يشادي
مايّعرف الزاجل وطلاع بالميل
وشرّه على اللي تدّرج بالحمادي
وأول دخول الوسم جتك الهماليل
وانشى من القبله وعم البلادي
واهل الدبّش عسّت تبي طاري السيل
أحدٍ قنع .. وأحدٍ كرب للشدادي
والشايب أرسل ياعيالي نبي الشيل
العايدي نايف … وبالسكس هادي
وجوه العيال معربين الاخاويل
فيهم وفا وايل وصبر المهادي
وشدو مع اللي معبسات الاشاميل
طوال الرقاب وكلبوهن تلادي
وضحً .. وتطرب للغنى والهوابيل
لاسمعّت الشايب بصوته ينادي
شايع على اللي تو مافر له ويل
اشهب من الساير كياسه جدادي
ماهمه التحميل لو جاه تحميل
وليا عطيته .. زود لاشك زادي
أشهب وكنه من خيار الرياجيل
صابر على الدنيا وحاديه حادي
ثم سنّدو دارً بها يبذر الهيل
يوم العرب هلكى… نهار الطرادي
دار ومرتع لأمهات المخاليل
حتى المقيض يهب فيه البرادي
مواردً جوها هل الخوّه زميل
يوم التفاهم في خشوم الهنادي
وجاهم ربيعً يثلج الصدر بالحيل
والوادي المنسي رجع صار وادي
والفاطر اللي جالها من الدهر ميل
احيا شحمها بأمر رب العبادي
صارت جلدّها كلبوها مطافيل
ارضً قفر ماحط فيها الحفادي
حب الفجوج الخاليه والتعاليل
من دونها كني بسجن انفرادي
ترا طراة العمر كسب التنافيل
وفعل الردا يغشى الوجيه السوادي
نبي ليا عدو هل الفعل بالجيل
لنا مع طوال الايادي ايادي
– حكمة يحتفظ بها شاعرنا لنفسه ؟
اللي يبي العليا يكافح مع الناس
والادمي هو من يحدد مصيره
اما طلعنا طلعتن ترفع الراس
والا انطحنا مثل حب الشعيره
– مارأيك في مواقع التواصل الاجتماعي ؟
التواصل يجعلك غالي وقريب
والقطاعة أكبر عيوب البشر
حالفً ماخلي القاطع نسيب
لو ساسه من طويلين العمر
– موقف أو ابيات فكاهية ؟
كنت أخذ علاج سنه كامله وبالنهاية طلع العلاج غلط واهديت للدكتور بيتين قلت فيهما :-
اهدي سلامي لدكتور الحساسيه
والله يبيض وجه وزارة الصحه
جابو شهادات مع خبرات دوليّه
لو تشكي الراس يصرفلك دوا كحه
– موقف هزك ولاتنساه طول حياتك ؟
رحيل غالي لن يتكرر والدي وعمي احمد الغضوري ابو جابر
رحمك الله يارجلن رحلت ولاقدرة انساك
اخذت العقل والتفكير وكل ايامي الحلوه
صحيح ان عشت وياهم ولاكن الفكر وياك
وانا اللي مستعن بالله ولاحوله ولاقوه
ولاكن تصعب الفرقا على اللي نادرن شرواك
رحلت وبيتنا العامر بعدكم عاكرً جوه
الا ياقبر تكفى طالبك خفف على اللي جاك
تراه اكرم من السحب المرادم لاكشف نوّه
– من تنصح وماذا تقول له ؟
قال يابن زيد لاجالك مجالي
انصح اللي وده لسمع النصيحه
واختصرت ابيات مافيها جدالي
للرجال اللي طبايعها مليحه
الرجال جزال مافيهم هزالي
والقبيح يرافق الناس القبيحه
مايعيش الادمي بليا ضلالي
ولا تطيب الا النفوس المستريحه
اترك الغيبه وقل ماهي حلالي
واستمع قول البخاري في صحيحه
واغتنم فرصْتك لاجوك الرجالي
المديحه لاتبدلها فضيحه
وفرحتك للضيف مع صفر الدلالي
والله ان عندي كرامتها ذبيحه
ولانصاك اللي شكى ضيم الليالي
لاتشح ابها كما الناس الشحيحه
والكريم معان من رب الجلالي
ماشكى حاله ولاسده يبيحه
واجتنابك مجتمع قيلن وقالي
وهرجت المترديه ويا النطيحه
خل منزالك على روس الجبالي
الجبل بعد الولي محدن يزيحه
مقتنع في بيت دامنه طرالي
للأمام الشافعي بيوتن فصيحه
الاسد من صمتته جاهم جفالي
ولايفيد الكلب لو يكثر نبيحه
ازهد الدنيا وترقى للمعالي
ومن تغره دنيته عجلن مطيحه
عايشن بالارض مدري وش بقالي
واحمد الله دام لي فعل وقريحه
يالله ان قدري كما لبست عقالي
يكفي ان لامت قال الله يبيحه
– ماعلاقة الشاعر فهد الغضوري مع شمر ؟
يالطنايا وابن وايل امه شلاقيّه
وكان مفخر في خوالي جعل مالي والي
دام راسي عايشن بالكوره الارضيّه
بالحرام ان الطنايا عصابتي وعقالي
– قصيدة لك احدثت ضجه اعلاميه عند قبيلة شمر وخصوصآ عشيرة الشلقان ماهي ؟؟
المعاني شايشه ومحتار ومنين اتكلم
كيف ماتحتار لامن جات من وسط المحاني
وعادتي لامن نويت القاف من نفسه تولم
والجزل ماجيت انا داعيه هو اللي دعاني
ومن كثر ما شاشت الافكار نستني أسلم
ياسلام الله على الشلقان قاصيها وداني
المراجل والكرم لو كان ترقاها بسلّم
استحى نجم الجدي تبجيل وسهيل اليماني
ياخوالي كل مجلس ادخله فيكم ينعّم
والله ان لولا الحيا لا اقوم وادح بمكاني
ياخوالي جاركم يشكي وشاربّه المدسّم
جاته الجلطات من كثر الشحم فوق الصياني
ياخوالي اسمكم فعلن ماهو هرجن معمم
أيه سموكم قضاة بفعلكم ذاك المكاني
يشهد مجيدع تهوّل يحسبن نفسه تحلّم
مادرى انه بواقعً يالله عساهم للجناني
قالو ابشر يالبناخي لاتندم لاتندم
دونك الاعمار نرخصها وراسك مايهاني
ارتكو للكايده بالقيض والموت يتقدّم
وكل منهم اشتهر بالطيب ذربين اليماني
ياخوالي ياصلاة الله على محمد وسلّم
جاركم ربي من الحساد وصدوف الزماني
كلمتن تطري علي دايم ورددها مجزّم
بيض الله وجه ابوي اللي بتعريبه حماني
وابشرو ببناخيً وقت اللوازم ماتبلم
لحتما الميقاف جملكّم وانا لساني حصاني
– أبيات ختاميةلشاعرنا الغضوري ؟
توكلنا على الله يامعاني واسعد اللحظات
ابي بالذاكره تبقى وجميع الناس توحيها
ليا طاب الولد قالو ابوه اللي رحل مامات
واذا خاب الولد قالو جدوده وامهم فيها
على حسب الطبيعه والبشر ماخلت الاموات
وانا ادري مستحيل اني جميع الناس برضيها
وانا مابرر الموقف واقول ان مامعي زلات
انا مثل البشر حالي يصوبها ويخطيها
غلطنا مثل ابونا ادم ولاتبنا من الغلطات
ولولا غلطته ماجيت بالدنيا واراضيها
ولاكن من هقابي حالفً ماخيب الهقوات
على نهج الجدود اللي بنوها جيت حاميها
وليامن المواقف والمدايح جالها حزات
اخذت المدحه وسلمتها في يد راعيها
يطيب الرجل بين الناس لامنه هرج باثبات
يثمن كلمته ويراجع الكلمه ويحكيها
اذا مالك مع اهل السمع سمع اخيرلك الاسكات
مهونه هرجتك والناس ماتصغي باذانيها
واذا زاد الحكي زاد الخطا ويقلل الهيبات
لو النيه تكحلها يجيلك يوم تعميها
انا ادري الناس ماترحم من التشهير والطعنات
ولاكن المصيبه هقوتن ماكنت هاقيها
احسب ان الموالي صاحب المعروف والوقفات
اثر بعض البنيخي شرّها .. جاء من بنيخيها
قطعت الوصل بالمغرور والنمام والشمات
مرض معدي عسى الله يكفي العالم لايعديها
ترى بعض المديح ان جاك من ناقص وله غايات
بعيني تعتبر ذمه … وقل مدحتك مابيها
واذا جاتك من الحاسد مذمه يارفيع الذات
تأكد منزلك شامخ وراس البعد راقيها
عسى ربي يجملني مع اللي صافي النيات
وعسى سود القلوب تزول ومعها يزول طاريها
