موجز حماك
أحمد عبد ربه، أستاذ العلوم السياسية بجامعة القاهرة، في تدوينة على حسابه بموقع التواصل الاجتماعي “فيس بوك”: “إيطاليا صعدت واستدعت السفير الإيطالي للتشاور، بحسب خبر عاجل في بي بي سي، ده مش قطع علاقات لكنه تصعيد ديبلوماسي، ممكن ينتهى بكذا سيناريو من أول عودة السفير مرة أخرى والاكتفاء بإظهار الامتعاض عبر الاحتفاظ بيه لمدة ما في روما، مرورًا بتخفيض مستوى التمثيل وصولًا إلي قطع العلاقات”.
“بغض النظر الموضوع هينتهي على إيه، بس خليكم فاكرين إن إحنا قلنا مصر لا تحتمل عزلة لا من الناحية الاقتصادية ولا الأمنية ولاحتى من ناحية شرعية النظام، والحل الوحيد لمصر هو أن كل هياكل سياستها تتغير، أساليب الفهلوة والاستهبال والقمع والضغط مش هتجيب غير مزيد من التراجع والعزلة”.
“وطبعًا في انتظار مقالات رأي من المثقفين المصريين إياهم عن استدعاء الروح الوطنية المصرية لمواجهة المؤامرة الأوروبية الغربية وتذكيرنا بتآمر الامبريالية العالمية على مشروع محمد على ومشروع عبد الناصر إلي آخر هذا الكلام البائس، وبرضه مش هيجيب فايدة، مصر ملهاش حل إلا الإصلاح السياسي، والله لو عملتوا إيه ده الحل الوحيد للي بيحب البلد فعلًا مش بينافق علشان يحافظ على مكاسبه الشخصية أو فكره الرجعي اللي اتجمد عند الخمسينيات”.
