موجز حماك
حركة “6 إبريل” الشبابية: جماعة الإخوان المسلمين ومحبيهم ومؤيديهم جزء من الشعب المصري، مثل عائلات ظباط الجيش والشرطة ومحبى النظام الحالي ومؤيديه، مضيفة، أنه لا يمكن إبادتهم فى أى مرحلة.
الحركة” فى بيان لها على موقع التواصل الاجتماعي “فيس بوك” : “الدولة اللى بنحلم بيها أهم أركانها العدل…العدل للجميع حتى وان اختلفنا معهم فكريا أو سياسيا…مصر بلد كبيرة وعدد مواطنيها كبير طبيعى فيه اختلافات عقائدية وثقافية واجتماعية….قدرنا اننا نعيش مع بعض ودورنا اننا ندير اختلافاتنا من غير ظلم وعشان كدا محتاجين نوضح شوية حاجات”.
“أولا..نظام الاخوان تولى الحكم بالفعل لمدة سنة..أيدناه فى حاجات وعارضناه فى حاجات ودا حقنا..طبيعى لما تمسك الحكم وتعرض نفسك للشأن العام انك تتقبل الانتقاد والمعارضة وحتى السخرية….لكن مقتلناش ولا سهلنا القتلولا حتى سكتنا عليه وبندفع التمن دلوقتى….ولما نزلنا 30يونيو كان علشان مطالبة مرسى بانتخابات مبكرة لان اخفاقه كان واضح..واللى لو كان قبل بيها كان وفر على البلد مشوار طويل وضحايا كتير أوى..
ثانيا.. طالما توليت المسئولية فلازم تبقى مستعد للمحاسبة لما بنقول العدل فدا ضرورى لاستمرار الحياة فى البلد دى ودا مش هيتم الا بمحاسبة كل من تولى مسئولية وسقط فى عهده شهداء…سواء مبارك او طنطاوى او مرسى او السيسى….وثقة الناس فى فكرة العدل نفسها مش هتحصل غير لما دا يتم فى اطارمنظومة عدالة انتقالية تشمل اجراءات للحقيقة والمكاشفة وجبر الضرر ورد الاف المظلوميات..
ثالثا.. جماعة الاخوان ومحبيهم ومؤيديهم…زى مئات الاف من عائلات ظباط الجيش والشرطة ومحبى النظام(مبارك أو السيسى) ومؤيديه هم جزء من الشعب ..شئنا أم أبينا.. حبيناهم أو كرهناهم..اختلفنا أو اتفقنا انما مش هينفع فى أى مرحلة نبيدهم أو نعملهم محرقة…ومش هتستقر البلد دى ولا تبدأ أى تقدم طالما استمرت دائرة الانتقام والقتل…كل نظام ييجى يحرق ويقتل ويشيطن كل من هو ضده..
رابعا.. حركة 6ابريل وكثير من القوى المدنية ارتكبت أخطاء.. لكن مينفعش أبدا تقارن بأخطاء أنظمة تولت الحكم والمسئولية وسقط شهداء فى عهدها…ومينفعش نختزل الأزمة فى انه الجميع أخطأ ولازم نتصالح و(نصطف)فى مواجهة النظام الحالى.. مش هينفع ولا هيحقق أى شىء بدون ما كل طرف يتحمل مسئولياته.. .ومينفعش أبدا يبقى تحمل مسئولية قتل بانك تقول انا اسف وخلاص..
خامسا.. الثورة قامت عشان تحقق للمصريين الحق والعدالة والحرية والحياة الكريمة.. ودى حادات متحققتش لان مطالبنا الكبيرة اختزلت فى صراع سياسى.. لكن مازالت أسباب قيام ثورة قائمة وأكتر من الأول…وهتحصل مهما طال الوقت طالما استمر الظلم”.
